بریکنگ نیوز: ’وزیر اعظم پیٹرول اور ڈیزل سستا کرنے کا کوئی موقع ہاتھ سے جانے نہیں دیتے‘

اسلام آباد (4 نومبر 2026): وزیر مملکت برائے خزانہ بلال اظہر کیانی کا کہنا ہے کہ وزیر اعظم شہباز شریف پیٹرول اور ڈیزل سستا کرنے کا کوئی موقع ہاتھ سے جانے نہیں دیتے۔

اے آر وائی نیوز سے خصوصی گفتگو کرتے ہوئے بلال اظہر کیانی نے بتایا کہ ملک میں تیل کی سستی سپلائی کیلیے ہر ممکن کوشش کر رہے ہیں، سپلائی کو یقینی بنایا گیا ہے اور قلت کی نوبت نہیں آئی، وزیر اعظم شہباز شریف نے تیل کی سپلائی کی یومیہ مانیٹرنگ کیلیے کمیٹی بنائی جو روزانہ کام کر رہی ہے، ان کی ہدایت پر ایک ایک کارگو کو مانیٹر کیا جا رہا ہے۔

بلال اظہر کیانی نے بتایا کہ ملک میں ریفائینریز کی پیدوار، سپلائی اور پھر تیل کی ملک بھر میں منتقلی پر مستقل کام ہو رہا ہے، وزیر اعظم شہباز شریف نے ہدایت کی ہے کہ مانیٹر کر کے کم سے کم قیمت میں پیٹرولیم مصنوعات کا کارگو لیں۔

وزیر مملکت برائے خزانہ کے مطابق وزیر اعظم کی فیول اسکیم کے تحت ایک کروڑ 20 لاکھ افراد کو فیول سبسڈی مل رہی ہے۔